我的奉獻禮

登登登櫈，我在2007年12月23日被Daddy和媽咪奉獻了！哈哈！請為我禱告，讓我在教會中更愛耶穌，更好成長。

特別鳴謝鍾樹森uncle牧師，他抱我祈禱，我居然唔喊，我真係成功！

新口味

　　經媽咪徵詢Sally titi意見之後，今日是我人生第一次嘗到奶奶以外的味道。我同媽咪都好期待和興奮。午餐過後，媽咪專程去了富泰邨街市買咗「香蕉」俾我，初初放進口的感覺有ｄ陌生，但食咗兩三口之後，我真的忍受不住美食的引誘，我竟然「出手」幫媽咪快ｄ將蕉蕉送進我口裡。Yumi！！蕉蕉實在太好味，我連有蕉蕉味的水水都食哂。
　　多謝天父賜我美食，奉主名求，阿們。

五個月

姓名：　　　楊諾禧 Nessa
年齡：　　　5 months
花名：　　　----
體重：　　　17.2磅
喜愛的食物：能恩HA1（厭奶期不穩定）
優點：　　　坐塔仔屙屎
口頭禪：　　Booo--
專長：　　　人肉花洒

2007年12月1日 大!便於此大便

今天，你有冇讚美神的理由呢？
媽咪今早拿出表姐姐送俾我的屎塔仔，好靚的黃色私家坐厠，俾我試吓在上面便便，當然是一試便成功，全家人都為之高興。榮耀歸神！
屙ｓ，舒服哂！！

註：屎塔仔裡面真係有料架，未能上載味道，真係有ｄ可惜。

我大個女啦

　　今日媽咪同我去做人生第一個旅遊證件，就是回港證同回鄉證，好等我聖誕可以跟爺爺嫲嫲公公婆婆上雅居樂渡假。這就是我的證件照。靚嗎？


　　去到做證時，個ｄAntie話我張相咁好笑容，所以要我笑吓來對對個樣，我當然照做啦，盡顯我人見人笑的本領。所以，好順利，好快就攪掂。（其間有少少哈碌嘢，就係媽咪幫我影印張出世紙後，唔記得取回正本，留了在學院的影印機上，要勞煩Uncle Sam拿來給Daddy，多得他仗義相助）。
　　今日係先甜後苦的一日，做完ｄ開心嘢，媽咪同姐姐（是新姐姐Melody）帶我去打針針，當然如上次一樣，嫲嫲來倍我啦，但今次我已經大個女咗，加上嫲嫲搬了之後很少見，我唔慣嫲嫲抱，加上我擁有女性的第六感，入到去未打已哭，要媽咪抱我安慰我，仲要睇醫生的魚魚（媽咪都係好鐘意睇，證明我們是兩母女）。今日的哭聲更長更大，打完後媽咪抱咗我出醫務所門口，話唔好嚇親其他小朋友。Sorry-ry呀，打針真係好痛架，你地都係過來人，應該明白我的感受。為我禱告今晚唔好有太大的反應，唔好發燒，平安平安渡過，謝謝。

四個月

姓名：　　　楊諾禧
年齡：　　　4 months
花名：　　　笑禧禧（珍姐姐改）
體重：　　　15.6磅
喜愛的食物：能恩HA1（平均5-6安士；五餐）
優點：　　　出街食飯冇扭計
口頭禪：　　呀Ya--
專長：　　　風車轉
　　　（媽咪今日發現我在Playpan撐到轉咗方向）
特別事項：　終於改用M碼片片

2007年10月27日抬頭

媽咪Daddy！我得咗啦！

我的第一次……

　　十月廿二日係一個值得紀念的日子，因為……我第一次被蚊蚊咬，仲要咬咗兩啖，好狼胎。而兇手可能已逃之夭夭，不過有一個疑犯被發現死咗係我張床上，現正接受調查……

三個月後……

　　Daddy今日早起身，所以得閒同我玩，好開心。開心的原因係有咗Playpan，我可以有多ｄ空間玩，唔洗俾架車仔限住，所以，Daddy媽咪都發現我而家已經能夠「手眼合一」（有時），自己玩玩具。要睇我ｄ精彩片段，請瀏覽我的相簿啦！

　　因為天氣轉涼啦，媽咪幫我加番食五餐奶奶，咁樣我會容易Ｄ食，又會快ｄ食完，夜晚飽飽地先瞓，瞓得好好多。而我食奶時也有新姿勢，好厲害的，知唔知呢個功夫仔叫咩名堂？咪係「腳指功」囉。犀利嘛？呢個功夫係經由專人指導，屋企嘅小朋友唔好亂咁模仿。



本週最好朋友來自馬來西亞，係James叔叔送給我的「毛毛蟲」，我很喜歡抱著它睡覺呢。
蟲蟲你隻腳腳好香啊！！

終於過了第100日，向第101日進發

　　昨天是我的100日生日，感謝神，我沒有「吵百鑼」（祖母大人語，應該係咁寫），所以Daddy媽咪好開心，同我打了星光大道用的手印和腳印。
　　今朝我繼續用緊神召會西環堂送的Playpan（特別鳴謝），苦練我手抓熊的功夫。媽咪話我似馬戲團表演。姑勿論如何，俾你哋睇吓我苦練的成果。

三個月啦

姓名：　　　楊諾禧
年齡：　　　3 months
花名：　　　肥頸（Daddy改）
體重：　　　13.5磅
喜愛的食物：能恩HA1（平均7安士）
優點：　　　人見人笑
口頭禪：　　ng--
專長：　　　手抓熊（公仔熊Winnie the Pooh）

10月6日告別豬兜兜

　　自出世以來，我都係瞓豬兜兜，但係今日媽咪話我大個咗，豬兜兜都唔可以兜住我啦，所以，學吓瞓床仔啦。（其實我三個星期大已經係自己瞓架啦，係咪好獨立呢？）
　　「告別」是人生必經的階段，先係告別臍帶，跟住告別豬兜兜，下一個會係告別咩呢？

我愛洗白白

　　幾個星期沒有露面，全因我兩個月要打針針，嫲嫲好慷慨（係佢俾錢），俾我打埋肺炎鏈球菌針，好貴的，不過保障我的健康，值得喎。不過就要一打打兩針，好痛呢！之後我仲發燒，退燒之後又嘔奶，係成支奶嘔哂出嚟，好嚴重，之後又肚瀉……唉！總之，好混亂。
　　這幾天才恢復元氣，四天前我愛上沖涼，宜家洗白白唔再喊啦，媽咪話遲ｄ可以買ｄ沖涼玩具俾我玩，好嘢！！我回復健康啦，胃口仲好好添，大家唔洗擔心。

兩個月的我

　　　　　　　　　　　　　姓名：　　　楊諾禧
　　　　　　　　　　　　　年齡：　　　2 months
　　　　　　　　　　　　　花名：　　　－－－
　　　　　　　　　　　　　體重：　　　12磅
　　　　　　　　　　　　　喜愛的食物：能恩HA1（平均6安士）
　　　　　　　　　　　　　優點：　　　愛清潔（沖涼前屙屎屎）
　　　　　　　　　　　　　口頭禪：　　oou--
　　　　　　　　　　　　　專長：　　　吹口水波（簡稱吹水）

再培訓計劃跟進報告

　　不知不覺Daddy已在馬來西亞兩星期了，時間過得很快，但係媽咪和我都已經很掛念Daddy。留言：「Daddy你好嗎？等著你回家！！－－囡囡字」
　　今日我要宣佈一件事，我自7/9開始，已經三晚唔洗飲夜奶，可以瞓過夜啦，總算給媽咪辛苦的訓練一個好的交代。多謝大家的支持，其他有ｂｂ的媽咪唔洗擔心，因為天父為每個生命都有獨特的計劃，所以你地嘅ｂｂ終有一晚都會可以唔洗飲夜奶，等你地可以有覺好瞓。
　　再培訓計劃總算告一段落，請以「掌聲鼓勵（普通話）」！！

P.S.　相簿有ｄ近照和短片上載咗，大家得閒睇吓啦。

再培訓計劃第七及第八天

今日的我

　　昨天Michelle姨姨教咗媽咪點樣幫我在沖涼之前「方便、方便」咗先，昨日好成功，媽咪嘆為觀止，從未親眼過咁壯觀的情景（因為每次都係包住片片發生）。今天輪到媽咪自己做，我都好合作，一樣攪掂，媽咪好開心，我也好開心，兩母女相望對笑，好溫馨啊！！當然「便便」完我好舒服，成個人醒哂！！仲好好瞓添，zzzzzz...............

再培訓計劃第五及六天

多謝Aggie姨姨從日本寄來的禮物，是handmade in Japan，一針一線有血有汗的。亞呢加多哥咋姨媽士打！！

　　昨天是我滿七週大的日子，因為媽咪要參加聚會，所以停寫了一天。大咗就真係大咗，我這兩天都可以不吃夜奶了，晚上十時半吃完奶，就睡覺，等到第二天早晨六時半才吃奶。今天我吃五安士奶了，並且我可以看見掛住係車仔Daddy送俾我個隻玉桂狗（Daddy特登吃McDonald換俾我的），哈哈！！「我一日一日長大，我一日一日進步」，感謝神！！
　　這兩天我都要媽咪唱住詩歌俾我聽住來瞓，真係好好聽，好冧啊！！至高享受。

再培訓計劃第四天

　　今日不單是我的再培訓日，更加係Gilda姐姐再培訓日，因為新學期開始了，媽咪要重投工作，所以Gilda姐姐要加倍努力，媽咪才可以放心將我交給她。
　　今天我一反常態，可能前兩天太乖了，今天十點鐘起床後，就幾精靈。到了下午，情況更加嚴峻，因為我不停地哭，媽咪都很叻，知道我是肚仔唔舒服，所以又幫我按摩，又抱又呵，都不能安撫我，媽咪只有不停為我禱告，求耶穌醫治，又唱住 "You are the God, that healeth me"，最後我六點十五分食完奶，終於得到釋放，原來我今日未「便便」，食完奶就攪掂咗，一身鬆哂，冇再哭了。可惜我未懂說話，苦了媽咪虛驚一場。

再培訓計劃第三天

　　媽咪即係媽咪，知女莫若母是也。昨晚果然未能一睡到天明，四點鐘就醒咗，仲鬼咁精神，眼仔碌碌，Sorry-ry啊媽咪！！你就當我有時差吧！
　　這兩天可能沒有Daddy在身邊，屋企變得異常寧靜，我就是倒頭大睡，連媽咪都開始有ｄ擔心我係咪病，因為昨天我睡到沒有「便便」，好彩今早攪掂咗，媽咪才沒那麼擔心。你知啦！食、瞓、屙是BB三件大事來的，很重要，缺一不可。不過，相信天父的保守（因為有Daddy同大家的禱告－－請問你有冇為我禱告啊？），都應該冇事的。
　　今天第一次跟從荷蘭回來的舅公公見面，我仲請咗佢飲茶茶（真係食蝦餃燒賣個ｄ），係咪好乖呢？舅公公今次行程緊密，還特意來到屯門見我，多謝哂啦，咁最開心就梗係倍舅公來的婆婆啦！希望婆婆多ｄ開心，快ｄ康復！

再培訓計劃第二天

　　先報告昨天的成績，我昨晚可以十一點食完奶睡到今早六點半，Yeah！！
　　今天是下雨天，今日姐姐係都要放假，所以Daddy拜託Michelle姨姨來幫吓媽咪手，媽咪當然有兩餐”好”好食，更加我今日舒舒服服咁瞓咗成日（除跟Daddy視像通話的時段），媽咪有ｄ擔心我今晚會不會「精神」病，唔瞓覺，但係實在無法攪醒我，唉！媽咪都話冇計，順其自然啦！
　　明天再報告我的情況。鳴謝Michelle姨的協助。

再培訓計劃第一天

這套是詠姑姐送俾我的衫衫和羊仔，好鐘意呀！Thank Q Gu Tze!!

　　今天是陰天，Daddy今天要暫離香港到馬來西亞工作三個星期，所以，今天也是媽咪的陰天。
　　Daddy向來都好庝我，所以媽咪怕Daddy肉痛，所以趁Daddy不在家的日子，為我度身訂造一套再培訓計劃，讓我將來有更美好的品格打好基礎。今天是第一天，我要學一個更好的作息習慣，要學識自己在我的「勞斯來斯」上睡覺，不用人抱，當然不是一件易事，因為我已給愛我的Daddy寵壞了，愛上抱抱，雖然我足足哭了兩小時，但最後都成功了，睡了個多小時，醒來個人真的很醒目，還喝了四安半奶，「便便」咗，然後沖涼好乖冇喊，媽咪都讚我好叻女，希望明天會更好，請為我禱告。

嘩嘩嘩！第一次打風呀！

香 港 天 文 台 宣 佈 預 計 在 今 天 ( 8 月 10 日 ) 下 午 3 時 30 分 或 以 前 發 出 八 號 熱 帶 氣 旋 警 告 信 號 ， 本 港 風 勢 將 會 加 強 。

政 府 提 醒 返 家 路 程 偏 遠 、 轉 折 或 居 住 離 島 的 市 民 ， 現 應 啟 程 回 家 。 政 府 已 通 知 屬 下 此 類 員 工 下 班 。

教 育 局 宣 佈 : 所 有 學 校 今 日 停 課 。 學 校 應 實 施 應 變 措 施 ， 確 保 學 生 安 全 ， 並 在 安 全 情 況 下 ， 安 排 學 生 返 家 。

　　今日係我人生第一次遇上八號風球，真係好緊張呀！呢個風叫帕布，原本已經離開咗香港，但因為有另一個風叫蝴蝶再吸引番個風返轉頭呀，真厲害！希望呢個風球唔好帶來太多傷害就好啦。

我今日第一日返崇拜呀！5-8-2007

　　今日我好開心，因為喺滿月前第一次返崇拜。Daddy話我乖呢，因為我在崇拜中沒有喊，我像很多返了崇拜很多年的人一樣，乖乖的睡覺，甚至他們敬拜時我也睡得很香甜呢！HO-HO!

　　這就是我第一次參加崇拜的地方，屯門屯富路22號的神召神學院禮拜堂！！

　　這就是媽咪和我出電梯門口的一刻！幾緊要呀！媽咪話Daddy長氣，令到我不能準時食奶奶，但我也很乖呢，沒有喊，因為「人活著不是單靠奶奶，乃是神口中的一切話語！」一個複數的男人！(A-men!)

Happy Birthday To Mammy...

（由於接獲投訴，敏感照片版已被刪除。）

　　媽咪生日快樂！媽咪生日快樂！媽咪生日快樂！媽咪生日快樂！～～～
　　今日係媽咪牛一，我零晨十二點二十分（因為唔知醒，所以遲了少少），已為媽咪奉上我最拿手的「芥辣之屎」蛋糕俾媽咪，係咪好孝順呢？亞姨問媽咪有冇插臘燭同影相，可能媽咪太開心之故，一時忘記咗，唔好意思，冇得同你地分享，下年啦！！
　　今日媽咪終於記得要磅吓自己幾重，因為她想著吓生我之前嘅衫褲，但很多都不合穿，所以要check吓自己有冇瘦番ｄ。呵呵！！我當然會幫媽咪保守秘密，唔話你知佢幾重，但係我就已經有……九磅重啦！！多謝哂媽咪悉心的照顧。

多謝你們啊！

多謝各位叔叔嬸嬸、哥哥姐姐的禮物。你們的隆情厚意實在「沒齒」難忘！（我現在真的是沒齒，無講笑。）

靜俏俏，長大了！

　　個多星期沒有我的消息，一眾Blog友有沒有掛住我呢？自青年使命大會之後，Daddy 仍然係好唔得閒，事關有班突然從國內來的弟兄姊妹，Daddy負責教導他們聖靈運作的操練，可能講了成日「煲東瓜」，所以回家都好疲倦了，而媽咪就給我偶發性夜間活躍症攪到唔夠瞓，所以佢有時間都會瞓吓，唔係真係會頂我唔順。
　　總括來說，這個多星期我係長大咗，昨晚已要飲4安士奶奶，而我的「大力金剛指」已練到有相當的威力，唔信問吓我媽咪。講住咁多先，要辦辦大事，唔好意思。

今天我的臍帶掉下來了！哈利路亞！

這真是一個值得記念的日子！因為我Daddy最怕看見我那「將掉未掉」的臍帶。但Daddy媽咪他們仍在作「地顫式搜索」，因為他們不知道我的臍帶掉到那裡去。我恐怕我的臍帶現在掉進我的「屎片」中，與我的「芥辣式大便」混在一起……

我的最新動向

　　Sorry各位，因為我出院的那一天剛好是一年一度，連續四天的《神召青年使命大會》，爸爸忙個不亦樂乎，所以無時間幫我update資料，真的不好意思。現在一次過為大家送上我的動向。

　　當我還在準備出院時，Daddy媽咪很無聊的在病房等我的「專車」（你看以下影片將會看見我的防彈玻璃專車駛出來的駕勢樣）。所以，他們東影西影，最無聊是差不多因此跌壞了他們的照相機！這些都是他們無聊的作品：順次序為（一）媽媽等出院留影；（二）證明我「亥」時出世的，醫院送給我的聖經首頁；和（三）醫院送的，影到我像無牙婆一樣的第一本個人影集！

出院當日盛況

Daddy真係幾開心同緊張，當媽咪訪問Daddy感想時，他緊張得失常，居然對住鏡頭挖耳，唉！


　　回家後，媽咪第一時間幫我適應吓佢地張床，我估我以後都會有很多時間睡在上面！（怎料，我現在是睡在床頭櫃上！）不過，睡床頭櫃都有個好處，就係我可以在上面sun-bath，你睇我幾「梳乎」。因為醫生話怕我會「黃」喎，要我住多幾日醫院，但係都係我Daddy醒，話我紅卜卜，所以先有得咁早出院。或者我Daddy「精打細算」啦！（我好積極咁睇呢件事。）

　　有一件事令我好感動啊！少爺（即係我Daddy）喂我啊！真係令我百感交集。去片！


　　呢幾日都好多人嚟探過我。多謝Sally姨姨同妙姑姐嚟幫我洗白白啦，又有Uncle Sam同Auntie Winnie嚟探我，鍾先生同鍾太也來，真係不得了。仲有同德希表哥仔合照。好開心！

當然，梗係仲要多謝出錢出力的祖母大人啦！萬歲、萬歲、萬萬歲！


如果想睇我今期相簿，就到這裡觀看～

Nessa's First Week at Home

多謝Daddy幫我做咁詳盡的報告，我會識做，夜晚會俾你同媽咪有覺好瞓！（但願如此，誠心所願！）

BB今天要回家了！

獨家大披露

媽咪入院前訪問。背景音樂，就是當天早上還在錄音的《聽我呼求》(Hear My Cry)。不是特意播出，只是在車上音響播放。去片！

我的第二天

　　對不起，今日Daddy很忙，沒有時間把我的「靚相」及時上網，以慰大家對我相思之苦。無所謂，總之大家可以見到我，遲一點也可以啦！
　　今朝一早，婆婆同公公就來到醫院探我。當然，媽咪都要帶他們來見吓我，婆婆讚我靚，最緊要話我似祖母大人。親家真識做！我媽咪仲第一時間，將我個靚樣（因為昨晚已經洗了我人生第一次白白）影低，MMS俾我Daddy仲添。俾你睇吓呢個MMS樣啦嗱～
　　我媽咪今日已經可以自己落床，不過由於昨天晚上傷口還很痛，所以祖母大人預備的晚餐就吃不到了，有些可惜呢。
　　講起祖母大人，真是出錢又出力，認真偉大。她在我的屋企（我都未返過果個屋企，聽講熱到好似火焰山咁，因為它像主的名一樣，從日出之地到日落之處都曬到！）教我們的菲佣姐姐煮飯俾我媽咪食，她的毛巾仔可以扭出兩盤汗出嚟。謝謝祖母大人！！
　　今日最偉大的就是我個少爺Daddy，因為他開始有啲住家男人feel。他居然拿一抽二lun的東西來給我和媽咪，連Uncle Sam都覺得嘆為觀止，差啲仲講埋「哈利路亞讚美神！」仲添。他二話不說，一個箭步，說時遲，那時快，在迅雷不及掩耳的情況下，轉身一探，把我Daddy腰中相機盜去，快快拍下這張偉大照片－－

登登登櫈………………
　　下午一眾神學院同工嚟探我，有聰叔叔同嬸嬸，有Uncle Sam，Uncle安，Aunty Ellena，仲有Iris姨姨同Irene姨姨，當然仲有Micheal哥哥仔。佢地仲講咗啲祝福我的說話添。佢哋一嚟到，探完媽咪，就嚟探我啦，無辦法，今日進進出出，都係要滿足各位對小妹的愛戴。Daddy第一時間影底我的熟睡樣。最重要的是，我到側好個頭仔，等佢哋唔使淨係影我個後尾枕。我都識做啦！
　　到咗旁晚，祖父大人終於出現，祖母大人也來了，表哥仔也來探我，好開心。我未出世時，他整天拍我媽咪肚dum，同我say hi，今次終於見面了。"How do you do?"練定英文，返屋企同姐姐傾計。

大姑姐和大姑丈送來的禮物

大禮物

　　特此更正：本來本段文字是《二姑姐和二姑丈送來的禮物》，經查證後是Daddy擺烏龍，因為他常常記得他自己是大仔，詠姑姐是二妹，妙姑姐是三妺，所以有此誤會。So-li, So-li。多多包涵。
　　以後都係叫詠姑姐同妙姑姐好了。

今日係我出世大日子

我相信大家都好心急要認識我，咁就俾你睇吓我Ｄ珍貴照片先啦！

Nessa Was Borned 070712

以下是我的資料

• 出生日期：2007年7月12日（星期四）
• 出生時間：好像是晚上九時（由於Daddy太緊張，所以只是依稀記得咁上下的時間，總之佢由產房出嚟時，大約是九時零五分）
• 出生重量：聽講係三公斤
• 我個名的意思是：
• 神承諾有新的一代，所以就是「諾禧」(a promised generation)。唔知我阿爸幾時咁好文采。不過個名好似係阿媽改的。
• 英文名仲勁，叫"Nessa"。唔識唔緊要，咁先至表明我好有深度。呢個係希伯來名嚟架，架勢呢！意思就係「神蹟」咁解。因為係我仲係大約在媽媽肚中廿週的時間，醫生話我會有啲問題喎。咁大家都信耶穌，全世界都為我祈禱，咪等神蹟囉。哈利路亞！今日等到嘞！如果你信醫生，就要信最大的醫生！無錯！登登登櫈－－就係耶穌！嘩哈哈哈！嘩哈哈哈！
  

　　今日我都算係咁啦，媽咪未去醫院之前，我都俾佢錄哂Pastor Markus Grieger啲歌，媽咪仲唱得好好聽仲添！有機會俾你哋聽吓。或者因為媽咪佢哋真係好中意服事神啦，所以先求祂的國和祂的義的人，神要供給他們需要的。所以我媽咪都經歷好大的神蹟。
　　其實有一件事都幾老土，星期二凌晨（即係11號)，我報咗一次「假案」，害到佢哋成晚無瞓，兼提早入院，結果第二日好無癮咁返番屋企（最緊要仲係好「瘀」）。咁所以媽咪佢哋話，做完神的工才入醫院。Daddy呢幾日好快就譯完咗啲詩歌，咁媽咪就唱埋啲Demo囉，仲今朝六點幾開始，一連唱咗三首仲添（總之好好聽，當我阿Daddy等我出世時，同一個虎門來的嬸嬸分享今朝他們還在「錄音」，竟被誤會我阿爸阿媽是歌星添）。或者佢唱果陣比較多運動量，又un吓un吓咁，所以對生我出嚟，有啲幫助啦。好人有好報！聖經講得啱：「然而，女人若常存信心、愛心，又聖潔自守，就必在生產上得救。」（提前二15）
　　結果呢？媽咪佢哋差唔多兩點半先去到醫院。Daddy等到差唔多四點幾，張怡雲醫生（幫我接生的醫生，好好人士）話我差不多八點幾、九點至出得世，咁佢咪大安旨意咁返去神學院「操曲」，因為下禮拜一年一度「神召青年使命大會」啲敬拜歌都幾新嘛。點知，佢駕車返屯門到半路，媽咪話佢知「穿咗水」，結果Daddy又要返番嚟囉。我未出世已經玩到佢謝啦，有啲唔好意思。無法，通常女都係黑老竇多啲！（但又親老竇多啲！能騙到老竇啲錢都多啲！）
　　Daddy同祖母大人都算嚟得快。媽咪在五時四十五分左右，她的子宮頸只是開了「一度半」（開到十度才可以生我出嚟），所以醫生估我無咁早出世。Daddy佢哋起勢叫人祈禱，因為媽咪子宮頸有向後彎的情況，更難生產。Daddy仲係個候產室度講方言，同埋命令個條子宮頸要「開」！結果，在七時四十五分，子宮頸開到四度。我阿媽開心到兼喊到飛起！姑娘話，入得產房生啦！結果八時十五分到，已經開到九度半，你都咪話唔係神蹟。醫生連飯都急急食完，仆到嚟醫院（佢講嫁，唔係我車出嚟！）八時四十五分，她來到開工，結果九時正，「呠」一聲生了我下來。當然，個中艱難，非為人母親者所能明白啦！
　　另一件奇蹟係，我Daddy見到我血淋淋個樣，無暈得一陣陣，又無嘔，佢都算勇敢嘞！大個仔，做人老竇，果然醒咗。
　　我祖母似乎很高興，週圍通知各方友好我出生了。真是辛苦我呢位公關大使。至於阿爺，佢就係屋企以逸代勞，見到我啲靚相，佢都讚不絕口。
　　好嘞，講住咁多先。我個書記（即係我Daddy）有啲頂唔順。
　　欲知後事如何，請看下回分解啦！